Судство

Се чека одлука на Апелација за случајот „Тенк“

05.09.2018 16:19

Шест жалби по пресудата на Кривичен за „Тенк“. Поранешниот премиер Груевски се повикува на застареност на делото. Не дојде на јавната седница. Второосудениот Поповски вели- „не можете по коњот, удирате по самарот.“ СЈО очекува потврда на првостепената пресуда...

Пет жалби на пресудата за „Тенк“ од поранешниот премиер Никола Груевски. Како што најави не се појави ниту тој, ниту пак, неговите бранители пред Судечкиот совет на скопска Апелација да ги образложи жалбите. Беа прочитани во нивно отсуство. Претходно, побарано изземање на специјалната јавна обвинителка Катица Јанева. Судот го отфрли со образложение- не било законски. На седницата присутни само Ѓоко Поповски и неговиот адвокат.

„Не сум криминалец и не сум ја злоупотребил службената положба“, рече поранешниот помошник- министер за јавни набавки во МВР, кој доби шест ипол години казна затвор. Ги образложи постапките за набавка на блиндирани возила, посочувајќи дека не сторил кривично дело. Излагањето го заврши со зборовите: „Во нашата чудесна земја, кога не можеш по коњот, удри по самарот“. Неговиот адвокат побара укинување на пресудата и предметот да се врати на повторно решавање.

Од СЈО, обвинителот Гаврил Бубевски, ги оцени како неосновани сите жалбени наоди поднесени од адвокатите на обвинетите. Ги наведе сите околности кои СЈО смета дека се контра жалбите на обвинетите.

Се чека одлуката на скопска Апелација, по жалбите на Груевски и Поповски, која што е извршна.

Наташа Гркова- Петрушевска