Белград- Приштина

Песимистички прогнози по посетата на Вучиќ на Косово

10.09.2018 12:57

Песимистички прогнози по дводневната посета на српскиот претседател Вучиќ на Косово. Главната порака од говорот во Митровица беше заклучокот дека Белград и Приштина се далеку од договорот којшто е неопходен за нормализирање на билатералните односи. Вучиќ изрази разочараност од недостигот на поддршка од меѓународната заедница. ЕУ и САД и натаму ќе посредуваат во процесот за постигнување на решение...

За косовскиот претседател Хашим Тачи, револтот на неговите сограѓани за време на посетата на претседателот на Србија Александар Вучиќ во Дреница е разбирлив, исто како и разочарувањето на Србите во селото Бање кои, поради блокади и забрана за влез, не можеа да се сретнат со својот претседател. На својот Фејсбук профил, Тачи напиша: „Ова покажува дека болката и раните од војната се свежи. Но, ако се трудиме за постигнување на мир и за помирување, протестите и блокадите не ни помагаат“. И опозициските движења во Косово со реакција за пораките на Вучиќ. Пратеничката на Демократски сојуз (ЛДК) Османи смета дека пораките од Северна Митровица се предвесник на тешки времиња за Западен Балкан. Во обраќањето, српскиот претседател ги повтори старите ставови и заложби, изразувајќи разочарување од недостигот на поддршка од меѓународната заедница.

Мораме и ќе мораме да живееме заедно и едни покрај други. И затоа ќе преговараме и разговараме до изнемоштеност ако треба. И поради тоа дојдов на Косово да ви кажам дека некој, некогаш во иднина ќе мора да постигне компромис со Албанците. Решението не е на видик, но се надевам и се молам да се случи во наредните 10-20 години. Сѐ друго би значело крај на нашето постоење на Косово и Метохија“, изјави српскиот претседател, Александар Вучиќ.

Според соработниците на Вучиќ, спикерот на косовското собрание, Кадри Весели, ги организирал инцидентите заедно со ветераните на УЧК. За политичарите од Белград, протестите биле алиби за Приштина да ја оправда хаотичната состојба во земјата, а посетата на Вучиќ докажала дека тој сака комромис. За разлика од нив, српската опозиција тврди дека говорот му послужил како средство за собирање политички поени. Приштински аналитичари оценуваат дека местата кои ги посетил српскиот претседател се линијата по која треба да се направи корекција на границата, за да се нормализираат односите меѓу Белград и Приштина.

Покрај европското посредување, во процесот на помирување асистираат и САД. По посетата на Приштина, нивниот сенатор Рон Џонсон на средби со владините преставници во Белград.

 

Маја Филдишев