Познати позициите на партиите

12.09.2018 15:28

Станува збор за иднината на нашите деца, да излеземе на референдум- порача премиерот Заев. Секој граѓанин по сопствено убедување да донесе одлука, став на ВМРО-ДПМНЕ...

Премиерот Заев со обраќање до јавноста. Ги повика граѓаните да излезат на референдумот, за европска Македонија. Вели, овој историски момент е поголем од сите нас, од партиите, кавгите или од личните интереси. Имаме единствена можност да ја зграпчиме оваа историска шанса. Според првиот човек на Владата, овој втор референдум ќе ја зацврсти нашата независност.

„На 30-ти септември, на референдумот, ние одлучуваме. Нашиот пат не е лесен, но добро знаеме што добиваме. Знаеме дека сме свои на своето, Македонци кои зборуваат признаен македонски јазик, граѓани кои се определуваат за подобар живот, со повисоки приходи, за добри работни места. Сето тоа во нашата убава Македонија, безбедна, сигурна, мирна, пријателска и стабилна. Европска. Во преговорите и со договорот ние ги зачувавме нашиот јазик и националност, нашата култура, ја зачувавме и нашата историја. Но, со успешен референдум ние како држава ќе ја осигуриме засекогаш и нашата иднина“, нагласува премиерот Заев во обраќањето до јавноста.

ВМРО-ДПМНЕ го соопшти конечниот став за референдумот. Опозициската партија повика секој да гласа по сопствено убедување. Како што рече Мицкоски, за националното прашање нема да решат партиите, туку граѓаните и вели, на таа одлука ќе се поклониме сите. Тој го повтори партискиот став дека Договорот со Грција е документ кој ниту тој, ниту ВМРО-ДПМНЕ го прифаќа, затоа што сметаат дека со него се менуваат Уставот, институционалниот идентитет, како клучен сегмент од националниот идентитет на еден народ и држава, личните карти, пасошите. Референдумското прашање е манипулативно, а владината кампања брутална и еднолична, оцени Мицкоски, кој рече дека тие се за членство во ЕУ и во НАТО.

„Република Македонија не смее да има поинаква иднина освен онаа трасираната кон овие организации. Но воедно ние сме  силно против Договорот, затоа што тој не ги одразува интересите на Република Македонија и се коси со Уставот и принципите на оваа земја. Донесовме одлука секој граѓанин да постапи според сопственото убедување. Секоја индивидуа, со сопствениот морал и совест ќе донесе одлука која смета дека е најдобра пред се за своето семејство и за нашата мила Македонија. Македонија ни е се. Нема партиите да одлучуваат, за национално прашање ќе одлучи нацијата и на нејзината одлука сите ние ќе се поклониме и тоа ќе биде тоа“, рече лидерот на ВМРО-ДПМНЕ, Христијан Мицкоски.

Лидерот на ВМРО-ДПМНЕ го повика премиерот Заев пред референдумот да се соочат на ТВ дуел за договорот, за аферите и корупциските скандали. Премиерот Заев одговори- подготвен сум да прифатам дебата, но кога јасно и јавно ќе каже дека е против бојкот на референдумот.

 

Викторија Милевска