Утре нова средба на лидерите на двете Кореи

17.09.2018 13:24

Утре и задутре претседателите на двете Кореи ќе имаат две рунди разговори. Ова е трета средба на двајцата лидери, од која се очекува натамошно подобрување на односите меѓу Сеул и Пјонг Јанг...

Лидерите на Јужна и Северна Кореја, Мун Џае-Ин и Ким Јонг-Ун на 18-ти и 19-ти септември ќе одржат две рунди разговори. Претставник на администрацијата на јужнокорејскиот претседател изјави дека, Мун Џае-Ин ќе пристигне во Пјонгјанг со директен лет од Сеул, на 18-ти септември во 10 часот, по локално време, а билатералната средба ќе се одржи во втората половина на денот. 

Граѓаните на двете земји со поделено мислење. Дел од нив посакуваат обединување, други сметаат дека тоа не е можно.

„Сакам да им кажам на луѓето колку е убаво да се биде во рацете на нашиот драг лидер, Ким Јонг Ун“.

„Сметам дека обединувањето треба да се случи што поскоро, навистина се надевам дека ќе стане реалност“.

„Обединувањето на нашата татковина беше најголема желба на големиот Другар Ким Ил Сунг и на другарот Ким Јонг Ил, а секако е и најголемата желба на сите нас, луѓето се молат за тоа. Сега во време кога нашиот народ го следи раководството на нашиот сакан врховен лидер Ким Јонг Ун и од позиција на силна нуклеарна сила, мислам дека обединувањето на нашата татковина ќе се случи наскоро“, велат жители на Северна Кореја.

„Мислам дека повторното обединување нема да се случи, бидејќи Јужна и Северна Кореја се одвоени повеќе од 50 години и имаат сосема различни вредности. Мислам дека ќе биде тешко да се пробие ѕидот“.

„Лично се надевам дека повторното обединување ќе се оствари. Ги гледав семејните средби на телевизија и беше срцепарателно. Навистина се надевам дека одвоените семејства ќе можат да живеат среќно заедно“, велат жители на Јужна Кореја.

Ова е трета средба меѓу двајцата лидери за намалување на тензиите на Корејскиот Полуостров. Мразот беше скршен во април во демилитарилизираната зона, откако Ким ја премина демаркациската линија и го повика претседателот Мун да дојде на територијата на Северна Кореја. Во пограничниот појас познат како Панмунџон, беше потпишан историски договор за денуклеаризација на Корејскиот Полуостров и за крај на војната.

Марина Ристова