Квалитетно информирање

17.09.2018 14:56

Неопходно е квалитетно информирање за да се донесе вистинска одлука- став на еврокомесарот Хан. Очекува граѓаните да учествуваат на изјаснувањето...

Неопходно е квалитетно информирање за референдумот бидејќи тоа значи носење на вистинската одлука, изјави еврокомесарот за соседска политика и проширување Јоханес Хан на конференцијата Денови на медиумите ЕУ- Западен Балкан. Говорејќи за слободата на изразување и значењето на медиумите, Хан ги повика македонските граѓани да излезат на гласање.

„Квалитетното известување им помага на граѓаните да носат информирани одлуки. Им благодарам на сите медиуми кои ги зацврстуваат своите заеднички напори да информираат на фактички начин за содржината на Договорот за името и за последиците од гласањето на граѓаните, но и за подигнувањето на свеста меѓу читателите и публиката за важноста на употребата на демократското право за гласање. Можам само да побарам од секој граѓанин да учествува на овој референдум бидејќи, како што видовме во многу референдуми во Европа и на други места, секој глас е важен, па затоа е одлучувачки да се учествува и да искористи демократското право“, изјави еврокомесарот Хан.

Премиерот Зоран Заев, е запознаен со информациите за мрежи на профили кои шират лажни вести, но нема информации за тоа кои земји го прават кај нас. Немам докази за руско влијание во земјава пред референдумот, изјави шефот на македонската влада.

Претставникот на ОБСЕ за слобода на медиумите Арлем Дезир изјави дека за една година откако е назначен на функцијата реагирал над 40 пати во земјите од Западен Балкан поради закани и физички напади кон новинарите. За него неопходно е во сите медиуми да биде регулиран статусот на новинарите.

Општ впечаток е дека закони за медиумите постојат, но треба тие да се фунционални и да се спроведуваат во пракса, рекоа говорниците на конференцијата. Саморегулацијата е една од алатките која ќе придонесе за квалитетно информирање на граѓаните.

 

Миле Ристески