Продолжува кампањата за референдумот на партиите од албанскиот кампус

17.09.2018 16:07

Партиите од албанскиот кампус ја продолжија кампањата за референдумот. ДУИ, ДПА, БЕСА и Алијансата ги повикаа граѓаните да дадат поддршка за евро- атлантската интеграција...

Референдумот на 30-ти септември значи стратегиска цел, силна и сигурна држава и подобра иднина за генерациите, рече лидерот на Демократската унија за интеграции Али Ахмети на трибината во Кичево.

„За сето ова, непрекинато работиме 17 години. Требаше прво да се реши проблемот со Бугарија, потоа дојде компромисот со Грција кој донесе незадоволства кај двете страни, но во него е иднината на сите граѓани без исклучок, бидеќи сме свесни за придобивките што ги носи зачленувањето во ЕУ и во НАТО. На 30-ти септември сите граѓани на Македонија заеднички сплотени ќе гласаат за вредности, бидеќи тоа е стратегиска цел на сите иако има и сили кои работат против заедничката цел“, изјави Ахмети.

Демократската партија на Албанците кампањата за референдумот ја продолжи во општина Студеничани, под мотото „Еден чекор напред, за во ЕУ и НАТО!“. Лидерот на партијата, Мендух Тачи, порача дека со гласањето „за“ на 30-ти септември ќе се позиционираме во НАТО и ЕУ.

„Ние сме задолжени, најдоброто што ни го даде НАТО на нас Албанците-мораме да им возвратиме. Гаранции за остварување на нашите цели се западните вредности, а ДПА тоа го гарантира, референдумот на 30-ти септември, е историски момент кој мора да го сфатиме сериозно, бидејќи се решава за иднината на нашите семејства. Нашата иднина е да станеме дел од најмоќната воено-политичка алијанса и на најсилната економска алијанса, Европската унија. Наша одговорност како граѓани и Албанци на референдумот е да го запечатиме нашето прозападно определување“, нагласи Тачи.

Само со успешен референдум, Македонија може да биде дел од НАТО и од ЕУ, порака од движењето БЕСА и од Алијансата на Албанците.

„Ќе може да имаме добра економија, квалитетно образование и напредно здравство. Граѓаните треба да гласаат „за“ на референдумот, со цел да се обезбедат мир и безбедност, а истовремено да се каже Стоп на влијанието од анти-НАТО во Македонија“, изјави Билал Касами, претседател на Движењето БЕСА.

„Треба да се мобилизираме и да дадеме максимум поддршка за членството на земјата во евроатланската алијанса и во ЕУ. Ви велам отворено и со голема убеденост дека друга алтернатива нема. Затоа заедно на 30-ти септември на референдумот да го дадеме гласот за НАТО и ЕУ, за да градиме една држава еднаква помеѓу сите заедници. Да на 30-ти септември, но и да по 30-ти септември за албанскиот јазик регулиран со Устав“, изјави Зијадин Села, претседател на Алијансата на Албанците.

Активностите за информирање на граѓаните за референдумот, партиите ги продолжат и во другите градови во државава.

 

Игор Панов