Енергетика

Владата ќе објави тендер за универзален снабдувач со струја на домаќинствата

17.09.2018 16:13

Владата распишува тендер за универзален снабдувач со електрична енергија за домаќинствата. Понудите ќе може да се доставуваат до 3-ти декември, по што ќе биде направен изборот. ЕЛЕМ и во наредните неколку години ќе остане главна заштита на цената на струјата за граѓаните...

Околу 28 лиценцирани компании ќе можат да се јават на тендерот за универзален снабдувач на електрична енергија за домаќинствата. Изборот треба да биде извршен до крајот на годинава, за граѓаните од март да одлучат од кого ќе купуваат струја.

На барање на Енергетската заедница и во согласност со европските директиви, ЕЛЕМ и натаму останува производител, велат од Владата. Компанијата до 2019-та година ќе треба да понуди 80 отсто од своето производство, по што процентот ќе намалува секоја година, сè до 30 отсто во 2025-та. Фирмите остануваат на слободниот пазар, можност добиваат и помалите дуќанчиња со мал број на вработени.

Од Министерството за економија посочуваат дека е во тек избор на локации за фотоволтаични панели, кои ќе бидат уште една можност за производство на електрична енергија.

Од Владата уверуваат дека сметките ќе останат речиси исти, користењето на евтината струја ќе зависи од пакетот што ќе го понуди снабдувачот.

 

Дијана Ценевска