Избегната трагедија во Охрид откако параглајдерист при слетување на пешачката патека удри во канделабра

Избегната голема трагедија, откако параглајдерист од Германија, при слетување заврши на пешачката патека во Охрид и удри во канделабра. Според првичните информации, параглајдерот полетал од месноста Баба на Галичица, а при обидот за слетување изгубил контрола и завршил во фреквентната пешачка зона. Во моментот на инцидентот на патеката се движеле мајка со мало дете и двајца пешаци, кои за среќа успеале да го избегнат ударот.

Параглајдеристите од Агенцијата за воздухопловство имаат три одобрени локации за слетување во Охрид, но не и на пешачката патека.

„Тука, секако дека не може да се изземе одговорноста на институциите, меѓутоа голем дел од одговорноста имаат и организаторите на самите настани, бидејќи тие треба да бидат повеќе свесни бидејќи сево таа фела, треба да ги знаат сите опасности и да преземат, односно да имаат соодветен план за управување со ризиците“, изјави Антонио Додевски, раководител на Планинска спасувачка служба на Црвен крст.

Случајот повторно ја отвора темата за безбедноста во авантуристичкиот туризам, кој е во подем, но недостига инфраструктура, построга регулатива, безбедност и контрола.

„Не треба да се оди по принципот ’лов на вештерки‘, туку треба системски да се седне и да се решава проблемот. Ова не е само еден проблем во параглајдингот, имаме слични состојби и во други сфери, каде што често недостасуваат елементарни планови за управување со ризици и соодветна едукација.“, додава Додески.

Засега нема информации за сериозни повреди кај параглајдеристот и неговата сопатничка. Но во Охрид секоја година има по три параглајдерски несреќи, некои со фатални последици.

Соња Рилковска