Писмо до Филе од Попоски и Вигенин

Република Бугарија и Република Македонија ќе ги интензивираат напорите за промовирање на добрососедските односи и соработка, вклучително и преку проекти и иницијативи кои би можеле да имаат практична вредност не само за двете земји, туку и за целиот регион. Ова се наведува во заедничкото писмо на министрите за надворешни работи на Република Бугарија и на Република Македонија - Кристијан Вигенин и Никола Попоски, до еврокомесарот за проширување Штефан Филе и комесарот за регионална политика Јоханес Хан.

Двете страни високо ги ценат можностите кои ги дава ЕК за зајакнување на партнерството преку програмите за територијална соработка, насочени кон посилен и одржлив економски и социјален развој на регионите, на тој начин стимулирајќи го нивниот потенцијал, се наведува во писмото. Министрите за надворешни работи ја потврдуваат подготвеноста на Република Бугарија и Република Македонија да ги прошират контактите меѓу надлежните институции за да обезбедат подобра координација и спроведување на заедничките проекти во области како што се инфраструктурата, економијата и подобрување на севкупното поврзување на регионот.

Сметаме дека треба да биде дадено приоритетно значење на постоечките проекти, кои се насочени кон развој на патната и железничка инфраструктура, со посебно внимание на Коридорот 8 ( исток-запад), посочуваат уште Кристијан Вигенин и Никола Попоски, нагласувајќи дека доделувањето на поголема финансиска помош за завршување на овие проекти е од клучно значење.