Мулен руж е дел од струмичкиот карневал

На два фронта е поделена групата Мулен руж. Посилниот пол работи на опремување на камионот, жените пак ги подготвуваат костумите, маските и периките. Ренесансата ќе биде главната тема која ќе покажат на Струмичкиот карневал. Ренесансата е обнова, велат тие, а годинава ќе се обнови и стариот струмички театар кој е вистинска љубов на струмичани. Воедно ќе одбележи и јубилеј 65 години постоење.
 

„Ќе почне обновата на стариот струмички театар и замислата ни беше да направиме една маска која ќе биде поврзана со ренесансата, со љубовта, со Ромео и Јулија, има ли нешто поубаво од љубовта“, вели Катерина Милушева дел од групната маска „Мулен руж“.
 

Она што ги прави оригинални маските на струмичкиот карневал е што во нив целосно е вложен трудот на учесниците. Од изборот на материјалите, па до финалниот изглед. Кроење, шиење, боење...

 

34-цата членови на групата со децении се претставуваат на карневалското дефиле. Цела година мислат, што и како и да и покажат на публиката.

 

 

Ентузијасти кои не чувствуваат замор. Главна цел им е да отидат и во Рио.

 

Струмица живее за карневалот. Ваквите сцени се повторуваат во повеќе домови во овој град. Она што останува е на 1 март сите да бидат дел од големото карневалско дефиле и да уживаат во гламурот и инвентивните идеи кои што струмичани овојпат ќе ги подготват за гостите.