2 ипол милиони упати и 13 милиони рецепти издадени за 6 месеци

По 6 месечна примена на системот за закажување лекарски прегледи и интервенции ,,Мој термин“ има јасна евиденција, поголем ред, но слабости што ќе се надградуваат.  Министерството за здравство денеска заедно со докторите разменуваше искуства за предностите и слабостите. Апелираат граѓаните и докторите да се придржуваат на закажаното време.

  ,,Во тие шест месеци се евидентирани над милион и двесте илјади пациенти колку што имаме и евидентирани електронски здравствени картички . Има над 2 ипол милиони упати и 13 милиони рецепти. Најчестите упатувања и заболувања се однесуваат кон интерната медицина, висок крвен притисок, потоа кон очен доктор, ортопед и за уво, нос и грло. Најмногу лекови се трошеле за висок притисок, за дијабет, дијазепами и метформин“-рече Милан Аризанкоски од Министерството за здравство.

 ,,Намалување на редиците за прегледи кај лекарите, намалување на метежот пред чекалните, добивање брза услуга, веродостојни податоци со електронската евиденција што ја воведовме на сите нивоа на здравствена заштита-тоа се главните придобивки, како и рационалното користење на времето на лекарот и на пациентот. Апелираме до граѓаните да се доаѓа навреме на закажан преглед, да се почека неколку дена за специјалистички преглед за да биде квалитетно направен. Сега работиме на информирање на пациентите да се придржуваат на закажаното  време“-изјави за МТВ Жаклина Чагороска од Министерството за здравство задолжена за Националниот систем за електронски евиденции.

Соња Стојановска