Зголемена опасност од птичји грип
Со есенскиот прелет на дивите птици кон југ се зголемува опасноста од ширењето на птичјиот грип. Болеста е зооноза, првенствено ги напаѓа птиците, но не е исклучена и можноста за зараза и заболување кај луѓето. Европските ветеринари, иако тоа досега не беше вообичаено, забележале дека вирусот во регионов бил присутен и во летните месеци …
Болеста е појавена во 37 земји од Европскиот континент. Во претходните години вирусот на птичјиот грип претежно изумирал во текот на летните месеци, но оваа епидемија трае во текот на целата година и полесно се шири меѓу јатата и птичјите популации, велат ветеринарите.
Болеста ја има во Западна Русија и во Казахстан, од каде преселниците, прелетуваат до местата за презимување, во некои делови преку Европскиот континент и нашава земја.
За живината и другите птици, ветеринарите препорачуваат ограничување на движењето надвор од живеалиштата, а одгледувачите треба да внимаваат и да преземат мерки да се спречи евентуален контакт со дивите птици и да не се привлече нивното внимание со давање вода и храна на живината во дворовите.
Промената во здравствената состојба на живината или зголемената смртност задожително треба да се пријави кај ветеринарните власти. Птичјиот грип е зооноза и од неа, првенствено заболуваат птиците, но, можно е да заболат и луѓето.
Болеста предизвикува големи економски загуби во живинарството, а кај птиците кои се чуваат како миленичиња и дивите птици, птичјиот грип предизвикува висока стапка на смртност.
Методија Трајков