СДСМ: Развоен буџет за 2024 година, повисоки плати и пензии

Буџетот за 2024 година, предложен од Владата предводена од СДСМ е развоен, креиран согласно потребите на граѓаните и на македонската економија. Предложениот буџет целосно обезбедува средства за повисоките пензии и плати, како и средства за реализација на капиталните инвестиции, соопштуваат од владејачката партија.

Вкупните приходи се планирани на ниво од 310,1 милијарди денари, што е за 10 отсто повеќе во однос на 2023 година, а расходите се планирани на ниво од 343,6 милијарди денари или за 5,8 отсто повеќе во однос на оваа година. Буџетскиот дефицит, проектиран на 3,4 отсто од БДП (33,5 милијарди денари), е во согласност со определбата за фискална консолидација, нагласуваат од СДСМ.

Капиталните инвестиции се планирани 45,1 милијарда денари. Очекувањата за 2024 година се раст на БДП од 3,4 проценти, раст на платите за 8,4 отсто и понатамошно намалување на инфлацијата на 3,6 отсто.

Целта на буџетот е поддршка на економскиот раст, фискална одржливост и редовна исплата на сите државни буџетски обврски - повисоки плати, пензии, социјални права, поддршка на земјоделците, на претпријатијата, фискална консолидација, справување со последиците од глобалната економска криза, стои во соопштението.