Џими Кимел четврти пат водител на „Оскарите“

Комичарот Џими Кимел четврти пат ќе биде домаќин на доделувањето „Оскари“, објавија вчера организаторите на најпрестижната свеченост во Холивуд.

Тој беше водител во 2017-та, 2018-та и оваа 2023-та година. Следното, 96-то доделување ќе се одржи на 10-ти март 2024-та година.

Оскарите веќе неколку години имаат ниска гледаност, а еден од начините да се врати преносот „во златното доба“, кога го гледаа 50 милиони гледачи – е лице како Кимел, сметаат организаторите на манифестацијата.

Овојпат доделувањето на престижната филмска награда ќе се одржи во време кога Холивуд закрепнува по шестмесечниот застој поради штрајкот на сценаристите и глумците. Овој штрајк, каков што не е забележан од 1960-та година, поттикна големи тензии меѓу филмските студија и филмските работници, потпалени и од стрим-услугите, како и од новостите со вештачката интелигенција во индустријата.