Здравствени работници во Скопје изразија незадоволство поради состојбите во здравството

30-минутната пауза место за кафе и појадок, здравствените работници ја искористија за протест. Бараат повисоки плати за 30 проценти, корекција на колективниот договор, бенефициран стаж, како и 4 насто инфективен додаток. Во недостиг на медицински персонал, горлив проблем е и нерегулираниот работен однос на вработените. Дел работат со договор на дело, други сами си плаќаат придонеси.

„Пет години сме со договор на дело, немаме ниту здравствено, ниту пензиско. Ниту право на боледување, ниту право на одмор. Ние не бараме да не наградат, бараме да ни го дадат тоа што го заслуживме. 20 илјади ни е платата, но сами треба да си плаќаме 1.800 денари за здравствено осигурување, практично имаме 18.000 денари плата“, изјави Биљана Џолева, медицинска сестра во Поликлиника „Јане Сандански“.

„Кога беше најтешкото за време на ковид-кризата тие млади луѓе беа во првите редови. Помогнаа и потребно е државата да им се заблагодари со нивна трансформација на работните места“, изјави Боби Бојчевски, Независен синдикат на вработени во здравството.

Предупредуваат дека катастрофалната состојба во здравството придонесува за се поголем одлив на кадар во приватните болници и во странство.

„Нема јавна институција каде што не недостига средно медицински персонал. Нема клиника во Клинички центар каде што не фалат техничари, инструментарки, медицински сестри итн.“- изјави д-р Јосиф Ѓорески – Гинеколошко-акушерска клиника.

Синдикатот бара средба со министерот за здравство.

„Ние сакаме да останеме, сакаме да работиме. Бараме услови, не терајте не да ги замениме професиите“, изјави Кристина Олевска, Независен синдикат на здравствени работници во ГОБ „8 Септември“.

Доколку не бидат повикани од страна на здравствените власти на разговори и на преговори, за в петок најавуваат нов протест, но овој пат пред Министерството за здравство. Не ја исклучуваат можноста за три недели да излезат и на протестен марш.

Андријана Ѓурческа