Столтенберг утре во Скопје на средби со државниот врв, ќе се обрати и во Собранието

Сараево, прва станица на балканската турнеја на првиот човек на НАТО, Столтенберг. Столтенберг порача сите босански политичари мора да работат на зачувување на единството.

„Ние сме загрижени од сецесионистичката и поделена реторика, како и од злонамерното странско мешање, вклучително и од Русија. Ова се заканува да ја поткопа стабилноста и ги попречува реформите. Сите политички лидери мора да работат на зачувување на единството, изградба на национални институции и помирување. Ова е клучно за стабилноста на безбедноста на земјата. НАТО е посветен на Босна и Херцеговина многу години. Вашата безбедност е важна за регионот на Западен Балкан и таа е важна за Европа“, изјави Јенс Столтенберг-генерален секретар на НАТО.

„Сакам да кажам дека соработката со НАТО ни дава можност за подобрена безбедност, подобрување на нашите одбранбени капацитети. Ние учествуваме во меѓународните мировни мисии и со тоа ја подобруваме силата на нашите оружени сили, би сакал да истакнам дека овие елементи гарантираат дека можеме да одговориме соодветно на сите предизвици, вклучително и тероризмот и организираниот криминал, сите други закани што можат да претставуваат опасност, не само во Босна и Херцеговина, туку и во целиот свет“, рече Борјана Кристо- премиер на БиХ.

По Босна, Столтенберг попладнево во посета на Косово, каде неодамна НАТО упати дополнителни војници во мисијата КФОР, по тензиите на северот од земјата. На косовските политичари како и утредента на српскиот претседател Вучиќ, Столтенберг ќе упати барање за враќање на преговорите меѓу Приштина и Белград како единствено решение за намалување на дестабилизацијата.

По Сараево, Приштина и Белград, генералниот секретар на НАТО ќе пристигне во Скопје, каде освен со македонскиот државен врв ќе се сретне и со сојузниците Словенија, Црна Гора и Албанија.

Ирина Гелевска