И по бербата нема одмор за овоштарите
Нема одмор за овоштарите. Експертите им препорачуваат овоштарниците да ги подготват за презимување и да ги искористат релативно пониските температури за вршење на заштита од болести и штетници. Во овој период работа има и за подготовка за новата градинарска сезона …
Овоштари да ги искористат овие месеци за есенските и зимски заштитни активности, порачуваат експертите. Пожелно е физички да се отстранат гнездата во кои презимуваат гасениците или јајцата на штетниците.
Кога ќе дозволат временските услови, потребно е да се испрскаат овошките со бордовска чорба против габични болести. Овошките кои се нападнати од грини, лисни и штитоносни вошки треба да се испрскаат со минерални масла, а младите овошки да се оградат или на друг начин да се заштитат од зајаци.
На крајот од месецов, активни треба да бидат и градинарите, особено оние кои се занимаваат со производство на расад за раноградинарско производство. Наскоро треба да почне и ѓубрењето на леите во оранжериите, а може да се посади зелена салата и лук.
Градините треба да се исчистат од остатоците од претходните култури, особено од кочаните од доцната зелка, каде што штетниците може да презимуваат за да се спречи нивното масовно појавување идната сезона.
Методија Трајков