Здравствените работници на протест
На протест денеска пред Министерството за здравство излегоа и Независниот синдикат на здравствени работници. И тие го изразија своето незадоволство од ниските плати. Предупредуваат катастрофалната состојба во здравството придонесе за поголем одлив на кадар.
Со договор на дело, без здравствено осигурување и плата помала од минималната – во вакви услови работат речиси две илјади здравствени работници низ земјава. Недостига кадар, а нови вработувања нема. Со нерешен статус работат повеќе од една деценија.
„Работиме без здравствено осигурување, фактички со 20.000 денари плата ако не платиме здравствено осигурување ние нема да имаме. 1800 денари е здравствено, значи ние земаме 18.200 основна плата. Немаме право на одмор, немаме право на боледување, немаме никакво право“, изјави Билјана Џонова – медицинска сестра во поликлиника „Јане Сандански“.
Пред Министерството за здравство излегоа на протест. Повисоки плати за 30 насто, нов колективен договор, бенефициран работен стаж и 4 насто инфективен додаток, ова се барањата на Независниот синдикат. Предупредуваат катастрофалната состојба во здравството придонесе за поголем одлив на кадар.
„Итно да се направи трансформација на сите времени вработувања кои ги има во сите здравствени институции на здравствен дом Скопје и Клинички центар, низ цела територија, со цел да ги задржиме тие млади луѓе, бидејќи работат за плата, може да се нарече социјална помош од 20.000 денари“, изјави Боби Бојчевски – Независен синдикат на вработени во здравството.
Последен пат со министерот за здравство имале средба на 5-ти октомври. Доколку не бидат повикани на разговор, за 2-ри декември најавуваат голем протест пред Владата. Министерот Меџити неколку пати нагласи дека пари за поголеми плати нема, и дека досега реализирал неколку средби со репрезентативните синдикати.
Андријана Ѓурческа