Хамас ослободи втора група заложници во замена за палестински затвореници, прекинот на огнот се одржува

По седум недели, дел од израелските заложници што ги држеше Хамас, се со своите семејства. Ослободените деца, мајки и баби се во добра здравствена состојба. Специјални тимови се грижат за нивното ментално и физичко здравје.

„Ужасот од заробеништво е навистина очигледен, но на ниту еден заложниците не му е потребна медицинска интервенција. Децата ќе бидат тука во болницата. Ќе продолжиме да се грижиме за нив, да ги придружуваме физички и психички“, изјави Итаи Песач, директор на детската болница „Шеба“.

Странските државјани што ги ослободи Хамас, исто така, се чувствуваат добро, а за нивното згрижување помагаат и амбасадите.

„Примивме 15 заложници, 14 од Тајланд, еден Филипинец. Тие се во стабилна состојба. Овде ја добиваат сета медицинска грижа. Тие немаат семејства овде. Значи ние сме всушност нивни семејства. Ние и амбасадите кои се тука, помагаат со сè, како и со преводи“, рече д-р Оснат Левцион-Корач, директор на медицинскиот центар Шамир-Асаф Харофех.

Палестинските тинејџери, ослободени во последната фаза од договорот меѓу Израел и Хамас беа пречекани во Западниот Брег на главниот плоштад во градот Ал Бире.

„Сите затвореници го споделуваа верувањето дека ниту еден затвореник нема да биде оставен зад решетки, а верувавме дека и Палестина ќе биде ослободена поради напорите на отпорот“, изјави ослободена тинејџерка од затворот Џенин.

„Не одведоа во седум часот изутрина, а околу десет ни рекоа дека има договор и ќе нè ослободат. Бевме многу изненадени, тоа беше прекрасно чувство“, рече ослободен тинејџер од Витлеем.

Израелските власти внимателно ја набљудуваат операцијата. И двете страни во конфликтот потенцираа дека борбите ќе продолжат по четиридневното примирје, иако САД, Катар и Египет велат дека е можно продолжување на прекинот на огнот за ослободување на повеќе заложници.

„Ова е сложен настан. Секој ваков ден е операција. Имаме штаб за оперативно разузнавање со кој израелската одбрана работи заедно со Службата за генерална безбедност и Мосад. Ние се занимаваме со ова 24 часа на ден, раководејќи го овој штаб“, изјави Даниел Хагари, портпарол на израелската одбрана.

На 7-ми октомври по нападите на Хамас врз Израел беа заробени 240 луѓе, и натаму не е позната состојбата на заложниците.

Маријана Димовска