Битола се приклучи кон кампањата „16 дена активизам против родово базирано насилство“

Ирена Димовска шест години била жртва на семејно насилство. Вели долго лутала низ лавиринтите на институциите, макотрпен бил процесот да се дојде до правда и мирен живот. Најголема поддршка добила од центрите за семејно насилство и од жени со иста судбина како нејзината.

„Иако патот низа институциите е тежок и не е секогаш пријатен, веќе сум изјавувала- доколку не се пријави, тоа е исто како да не се случило, мора да се пријави за да може да докажеме, дека навистина сме жртви и да не се турка тоа под тепих“, изјави Ирена Димовска-жртва на семејно насилство.

Според статистиките на труд и социјала, годишно во просек има околу 1.500 нови пријави за семејно насилство. Но, според истражувањето на ОБСЕ во 2019-та, состојбата е алармантна, а бројките далеку од реални.

„Жените го пријавуваат само најсериозниот инцидент, и дека оваа бројка во суштина претставува само 2% од вкупниот број“, изјави Елена Димушевска- Национална мрежа против насилство врз жени и семејно насилство.

Во Битола веќе една година функционира Женскиот центар за поддршка. За овој период пружена е помош на 57 корисници, од кои 29 се жени, а 28 малолетни деца.

„Оваа бројка покажува дека во нашиот регион семејното насилство е прилично присутно, веројатно оваа бројка ќе се зголемува како што ќе се охрабруваат да пријавуваат“, изјави проф. д-р Гордана Ристевска- Димитровска, Женски центар за поддршка-Битола.

Покрај Центарот за поддршка, една од заложбите на локалната самоуправа е Битола е да добие Шелтер центар.

Оваа кампања се спроведува во текот на 16 дена, во период од 25-ти ноември кога се одбележува Меѓународниот ден за елиминација на насилство против жените и 10-ти декември – Меѓународниот ден на човекови права.

Александра Максимовска