МТВ обележува 59 години од првите вести емитувани на тогашната телевизија Скопје
На 14-ти декември 1964 година беше емитуван првиот телевизиски дневник. Од тогаш генерации новинари и медиумски работници трајно се вложуваат во развојот на Македонската телевизија. Стојат пред предизвиците за навремено и прецизно информирање. Архивата - сведоштво за делото на јавниот сервис.
Телевизијата во која некогаш работеа дваесетина луѓе денес е најголема медиумска куќа. Новинари, сниматели, монтажери, тон-мајстори и други професионалци работат во функција на јавниот интерес. Македонската телевизија низ годините покажа што значи вистинско информирање, преку континуирана обука на стручниот кадар и максимална заложба на почитување на кодексот на новинарите и етичкото известување.
Се што се објавува темелно се проверува, за граѓаните во секое време да знаат дека добиваат точни податоци. Освен информирање, медиумската писменост е приоритет на јавниот сервис.
Од детски интерактивни квизови, преку музички емисии од забавен и народен карактер, серии од сопствена продукција – шареноликата програма на МТВ нуди забава за сите генерации гледачи.
Паралелно со информативните појаси, акцент во програма јавниот сервис става и на спортските рубрики.
Не се изоставени ниту припадниците од најголемите етнички заедници. Најсвежи информации што ја тангираат нивната публика се емитуваат секојдневно.
14-ти декември 1964 година е значаен ден за МТВ. Пред 59 години од импровизирано студио беа емитувани првите вести на тогашната телевизија Скопје, во траење од 20 минути. Денес од оваа студио вие ги гледате најновите информации од земјата и светот.
Низ годините постојан развој. Со нови студија и најнова технологија македонската телевизија влегува во новата година. Визуализација по стандардите на европските и светските јавни сервиси. Со виртуелната реалност, сите точки на светот ќе ги донесеме на едно место во нашиот простор. Тоа ќе создаде можност на гледачите на прецизен начин да им се презентираат светските текови и процеси.
Се менуваат генерации и медиумски работници, но сведоштвата остануваат во депото на архивата на македонската телевизија како непроценливо богатство и културно наследство.