Со камери ќе се снимаат потпалувачите на оган на нивите

Со помош на камери поставени на антените на телекомуникациските оператори на 10 локации во земјава, Државниот инспекторат за земјоделство ќе го контролира и санкционира палењето стрништа во земјава. Се работи за пилот-проект, со поставување камери со видливост до 10 километри, со што ќе може да се видат и да се санкционираат земјоделците коишто ги палат своите стрништа.

Овие камери се осетливи на чад и инспекторите преку телефонски или компјутерски пораки ќе алармираат дека на локациите каде што е поставена камерата има пожар. Заедно со противпожарната служба и полицијата ќе се оди на местото за да се најдат сторителите или да се спречи огнот да направи поголем проблем.

Палењето на остатоците од жетвата на житата е сериозен проблем во земјава, велат од Инспекторатот. Само од почетокот на годината до сега се направени 114 записници, а откриени се само четири сторители. Ова е проблем особено во Кочанскиот, Пелагонискиот Регион и во Тетовското Поле. Земјоделците имаат навика и сметаат дека ако ја запалат нивата, полесно ќе ја обработуваат, што не е точно. Од Инспекторатот очекуваат дека од наредната година со овој систем ќе биде опфатена целата држава по примерот на многу земји во светот.

Методија Трајков