Пресечен уште еден нарко канал- запленети над 35 килограми марихуана

Министерството за внатрешни работи во соработка со Царинска управа на Република Македонија реализира случај на недозволена трговија со марихуана која по потекло е од Албанија, при што запленети се над 35 килограми марихуана со што е пресечен меѓународен канал од Албанија преку Македонија – Грција со крајна дестинација земјите од Западна Европа.

Во текот на вчерашниот ден преземени се мерки и активности од страна на МВР и Царинска Управа на граничниот премин Богородица, на излез од Македонија  извршен е преглед и претрес над возило “Пежо Партнер” со грчка регистарска ознака управувано од З.Р.(32) албански државјанин, а со цел полесно пронаоѓање на наркотична дрога од страна на царинските службеници употребено е службено куче - трагач на наркотична дрога кое што при обиколката на возилото реагирало на задниот дел од возилото.

По извршениот претрес на возилото, при што во задниот дел предвиден за багаж, пронајден е специјално изработен бункер  во кој биле сокриени 35 пакувања обвиткани со кафеава селотејп трака исполнети со непозната растителна материја – марихуана и еден пиштол марка Црвена Застава ТТ и рамка со 7 куршуми калибар 7,62 мм. Одземената растителна материја е предадена во Одделот за криминалистичко технички испитувања и вештачења при МВР заради понатамошно вештачење, при што е утврдено дека се работи за 36.300 грама марихуана со висок квалитет.

Запленетата марихуана при продажба на нарко пазар би достигнал цена од околу 100.000 евра.