Ќе продолжи изградбата на штипската и кичевската болница, најави Меџити
Активирање на банкарските гаранции на изведувачите на новата клиничка болница во Штип и болницата во Кичево и кривична пријава против нив заради тоа што не ги исполниле обврските од договорот – најави министерот за здравство. Во февруари ќе биде распишан тендер за избор на нов изведувач на болницата во Штип. После 33 години ќе продолжи изградбата и на болницата во Кичево…
Со 27 милиони евра кредит од Банката на Советот на Европа, во 2016-та почна изградбата на новата клиничка болница во Штип. Се изгради околу 40 насто и запре заради неисплатени обврски од грчки „Интеркат“ како изведувач и „Бетон“ како подизведувач.
Непочитувањето на роковите резултираше со стопирање на средствата од кредитот, по што владата најави продолжување на изградбата со сопствени средства. Овде влегуваат и банкарските гаранции на изведувачите на штипската, но и на кичевската болница
Градежните компании кои не ги изградија штипската и кичевската болница ќе добијат и кривични пријави заради оштетување на државниот буџет.
Министерот Меџити ја посети Клиничка болница Штип заради промоција на новата ендоскопска опрема за потребите на хируршкото, неврохируршкото, ортопедското и уролошкото одделение која ја обезбеди Министерството за здравство.
Славица Величковска