Во источниот регион фалат пожарникари

Поголемиот дел од територијалните противпожарни единици во источниот дел од државата и оваа година се соочувата со старите проблеми, недостиг на  доволно опрема и кадар.

„Општина Пробиштип треба да брои 17 пожарникари, а ние сме 10. Еден колега е подолго време на боледување, значи работиме деветмина“, изјави Васе Митревски – командир на ТППЕ Пробиштип.

„Работиме со три цистерни и едно теренско возило „лада нива“, што со оглед на територијата што ја покриваме е многу малку“, смета  Димитар Букушовски – командир на ТППЕ Берово. 

Источниот  регионот има 180.000 жители и 89 пожарникари, а законот предвидуваат по еден пожарникар на секои 1.500 жители. Тоа значи дека на истокот му фалат 30 пожарникари. Од нив најголем проблем со кадар имаат Кочани и Пробиштип, каде  се работи со по 10 пожарникари помалку од потребното.

Исклучок е Штип, каде опремата е обновена пред неколку години.

„Располагаме со пет возила и една „Лада нива“, значи комплетно сме опремени со опрема за сите видови интервенции: сообраќајки, поплави, земјотреси“,  изјави Кирчо Патраклиев, командир на ТППЕ – Штип.

Во просек, годишно во овој дел од државата, пожарникарите  гаснат по 300 – 450 пожари од кои околу 250 се на отворено, а најголема причина за нив е човечкот фактор.

„Ние како полициска станица ќе упатуваме зачестени полициски контроли, се со цел да ги спречиме пожарите“, потенцира  Дејан Петров, командир на ПС – Штип.

Иако, пред пожарникарите е сезона на искушенија, тие се  едногласни во ставот дека имаат доволно искуство и знаења, да се справат со секоја ситуација, но апелираат на внимателност и коректност од страна на граѓаните.

Оливера Жежова