Почна судскиот процес против родителите на Коста Кецмановиќ, тврдат дека не се виновни

На судскиот процес против родителите на малолетниот убиец Коста Кецмановиќ, Владимир и Миљана одлучено е главниот претрес да биде затворен за јавноста, и како што дознаваме истите ја негираа вината.

Владимир Кецмановиќ е обвинет за тешки кривични дела против општата безбедност, односно дека го обучувал својот 13-годишен син да ракува со огнено оружје, го водел на стрелиште, а оружјето не го чувал безбедно како што е предвидено со закон, за што е побарана 13-годишна казна затвор.

Мајката на убиецот, Миљана, е обвинета за недозволено изработување, држење и носење оружје и експлозивни материјали, и е побарана казна затвор од 2,5 години.

Во судот, таткото на масовниот убиец е донесен со лисици на рацете. Имаше кратка средба со сопругата Миљана, и двајцата со солзи во очите, а спроти нив беа родителите на убиените деца со нивни фотографии.

Според обвинението, таткото во повеќе наврати го обучувал синот убиец да ракува со огнено оружје, муниција и да гаѓа во подвижни цели, со воздушна пушка, но и со пиштоли Глок и Чешка зброевка со која вежбале и гаѓање на силуети на луѓе.

Мајката, ја немала проверено училишната торба на Коста, која тој три дена ја поседувал внатре со оружје, муниција и молотови коктели, а постои и доказен материјал дека нејзина ДНК е пронајдена на чаурите во училиштето Рибникар.

И двајцата родители на рочиштето се изјаснија за невини. Судска постапка се води и за сопственикот на стреланата каде вежбал малолетниот убиец и за инструкторот, за давање на лажно сведочење, за што е предвидена казна од три години затвор.

Утре продолжува судењето со изнесување на докази на одбраната, кое е затврено за јавноста се до окончување на процесот.

Малолетниот Коста Кецмановиќ кој уби 10 лица во училиштето Рибникар, не е опфатен со кривична постапка поради 13-годишната возраст и се наоѓа во психијатриска установа.

Оливер Бранковиќ, дописник од Белград за МРТ