Следната недела Комисијата за заразни болести ќе одлучува за состојбата со големата кашлица
Следната недела Комисијата за заразни болести ќе има состанок на кој ќе одлучува по состојбата за големата кашлица. Смируваат дека засега нема простор за паника и покрај растечкиот број на болни но и лошата слика од соседството каде што починаа четири бебиња...
Возрасните кашлаат до две минути без престан, но бебињата престануваат да дишат. Големата кашлица која го тресе регионот и од која починаа четири деца во Србија, инфектираше седуммина и кај нас. За среќа последното заболено бебе во Козле е стабилно.
Од Комисијата за заразни болести велат дека ја следат состојбата. Засега нема простор за паника и наредната недела ќе имаат состанок на кој ќе донесат одлука како ќе се постапува.
Сепак, имунологот и педијатарот Ставриќ, вели дека најмалите се во најголем ризик.
Симптомите за голема кашлица се како кај настинка, со течење на носот, поткашлување, а може да е проследена и со температура. Причина за ширењето е намалениот опфат со имунизација.
Десет години по имунизацијата организмот го заборава имунитетот стекнат од вакцина. Болеста се пренесува преку контакт со заболен. Со брисеви од нос и грло може да се докаже присуството на бактеријата која ја предизвикува големата кашлица.
Наташа Јанчиќ Менковски