Унгарија попушти, одобрена ЕУ-помошта за Украина

Европската унија постигна едногласна согласност за помош од 50 милијарди евра за Украина. 27 лидери на земјите-членки на самитот во Брисел постигнаа консензус, откако беа надминати несогласувањата со унгарскиот премиер Виктор Орбан кој во декември стави вето. И Киев и Брисел го поздравија постигнатиот договор.

„Го поздравуваме договорот за обезбедување на долгорочна финансиска помош за Украина. Ова е добра вест. Украина е наш приоритет. Ова ќе ни ги обезбеди кредибилитетот, легитимитетот и предвидливоста кои се очекуваат од нас, бидејќи безбедност на Украина е и европска безбедност“, изјави Роберта Мецола, претседателка на Европскиот парламент.

„Многу е важно тоа што одлуката ја донесоа едногласно сите 27 лидери. Тоа е уште еден показател на вашата силна обединетост и поддршка за Украина. На последниот самит, кредибилитетот на Европската унија беше доведен во прашање, а сега заеднички го зајакнавме“, изјави Зеленски.

Финансиската помош од 50 милијарди евра ќе и помогне на Украина да ги исплати пензиите, платите и другите трошоци во следните неколку години. Првата транша од пакетот Киев ја очекува во март.

А додека европските лидери на вонредниот самит разговараа за ревизија на финансиската рамка на Унијата за периодот од 2021-ва до 2027 година, европските земјоделци ги блокираа улиците и плоштадите околу европските институции. Земјоделците се незадоволни од зголемените трошоци, правила и бирократијата.

Марија Котовска