Втор ден штрајк во Фондот за здравство, се извршуваат само најитните работни задачи

Вратите на Фондот за здравство и денеска останаа затворени за осигурениците. Работи само еден шалтер за итни случаи.

„Само итни случаи, инаку не може. Па итен случај сум, не можам да земам лекови“.

Вработените не попуштаат – втор ден во штрајк поради заклучокот да има се намалат платите за 21 насто. Дел од граѓаните збунети од написите за „штрајк“, заминаа без да завршат работа. 

„Штрајк? Треба да поднесам за боледување каков штрајк, треба да поднесам боледување за трудници“.

„Госпоѓо втор ден штрајкуваат – не знаев, ме испратија од ПИОМ со здравствената книшка“.

„Требаше на мајка ми да ѝ се продолжи здравственото осигурување ете не може. А од матичен лекар треба да земе апчиња на рецепта кои и се важни за здравјето. Ама ете ништо“.

Не се исплаќаат надоместоци за породилно и други боледување, нема ниту рефундирање на пари. Се издаваат само рецепти и упати.

„Кога станува збор за дете кое треба да се пријави за здравствено осигурување кај родителите, шалтерите работат за нив, кога станува збор за хоспитализирано лице или треба да се хоспитализира, а го нема регулирано здравственото осигурување за нив работат. Исто така итните лекувања во странство“, изјави Бранко Аџигогов, претседател на Синдикалната организација на ФЗОМ.

Поддршка за штрајкот на вработените во Фондот стигна и од министерот за здравство.

„Јас поддржувам секаков штрајк не само во здравството, тоа е свето право на секој поединец загарантирано со уставот на државата“, изјави Фатмир Меџити, министер за здравство.

Синдикатите рекоа дека се подготвени да ги блокираат платите во целиот здравствен систем и порачаа – не прифаќаме намалување на нашите примања.

Андријана Ѓурческа