Напад во Истанбул, повеќемина ранети

За време на годишнината од катастрофалниот земјотрес во Турција, нов инцидент со загинати се случи во Истанбул. Двајцата напаѓачи се убиени, додека повеќемина се ранети при нападот на судот во најголемиот град во Турција. Меѓу повредените се и тројца полицајци. Пред палатата на правдата во турскиот мегалополис, очевидците го прераскажуваат кошмарот.

 

„Имав некоја работа во судот и кога завршив, одејќи кон излезот, слушнав истрели и интензивна престрелка. Ги видов терористите со сопствени очи. Тоа беа маж и жена кои се стрелаа со полицијата. Прв беше погоден мажот, а по неколку нејзини истрели и таа падна“, изјави Махирт Јилдиз, очевидец.

„Видов дека терористите лежат на земјата, и тогаш жената сакаше да истрела, но ја неутрализираа. Претходно фрли и торба кон полицијата, тогаш ми смрзна крвта. Луѓето беа престрашени, беа во бегство“, изјави Емре Озиурт, очевидец.

Итно реагираше и шефот на турската држава, актот го нарече терористички.

„Двајцата терористи, мажот и жената, беа неутрализирани од полицијата пред да ги остварат злобните цели. Турција ќе продолжи да се бори против сите терористички организации и против нивните следбеници, со посветеност без дискриминација. Го молам Господ за брзо закрепнување на повредените. И го молам за милост кон едното лице кое беше рането, а потоа почина“, изјави Реџеп Тајип Ердоган, претседател на Турција.

Првите податоци се скудни-терористите биле дел од ултралевичарска групација. Судот во Истанбул е најголемата правосудна установа во Европа и во Турција.

 

Зоран Богатинов