Бразуката од вечерва го тркала светот!
Милиони луѓе дишат како еден поради најважната споредна работа на светот. Во Бразил се слеваат реки фанови на фудбалот од целиот свет...
Почна фудбалската треска. Бразил, земјата на самбата живее во ритамот на фудбалот. Милиони луѓе дишат како еден поради најважната споредна работа на светот. Во Бразил се слеваат реки фанови на фудбалот од целиот свет.
„Подготвени сме за туристите, имаме голем број сувенири, капи, знамиња, дресови“, вели една улична продавачка.
„И мојот пес е подготвен да навива за Бразил“, вели една навивачка.
„Сакам Бразил да биде шампион, но не поскаувам Аргентина да ни биде противник ниту на еден натпревар. Тие ни се најголеми ривали“, смета Алваро Агуар.
Стадионите не се изградени докрај, но за натпреварите на најсилните фудбалски репрезентации, нема веќе билети.
„Светските првенства секогаш се задоволство за навивачите, среќни сме што оваа година нашата земја е домаќин“, вели еден навивач.
Обложувалниците во светот преполни, во Тајланд деновиве најактуелно е обложувањето за светското првенство. Според анкетите тоа се зголемило за 26 насто.
Наспроти вистинските фудбалери, таму и слоновите се добри играчи. Организаторите со желба преку играта на слоновите да го промовираат фудбалот, но и да се спротивстават на илегалните обложувања.
Иако на светското првенство му претходеа масовни штрајкови поради големите суми потрошени за подготовките, бразилците и светот заборавија, Бразуката од вечерва го тркала светот.
Марија Петковска