Партиите и коалициите ги објавуваат фаворитите за претседателските избори

Не беше заинтересиран за претседателската функција, па се премисли. Арбен Таравари сепак ѝ фрли око на „Вила Водно“. Со поддршката на Гаши, Касами и Меџити ќе биде кандидат за претседател на Европскиот сојуз за промени. Првиот човек на Алијанса за Албанците вели дека ќе се води од Хипократовата заклетва и со неговиот избор би се создала можност-различностите да се претворат во уметност на соживот и хармонија. Уверен е дека во наредните два дена ќе ги собере потребните 10.000 потписи, ќе бара поддршка и од македонските партии.

Професорката Ванковска и докторот Марковски засега се единствените предложени кандидати. Власта и опозицијата сè уште калкулираат. ВМРО-ДПМНЕ на 2-ри март на конвенција ќе го избира претседателскиот кандидат. Во игра се три имиња, неофицијално и пратеничката Силјановска.

Социјалдемократите убедени дека нивниот кандидат ќе биде победник иако сè уште не го соопштиле неговото име. Велат-постапката согласно со статутот на партијата трае. Предложени се неколку имиња и во месните и во општинските организации, меѓу нив и актуелниот шеф на државата Стево Пендаровски. По кавгата со него сè поизвесно е дека и интегративците ќе имаат самостоен настап на претседателските избори. Свои кандидати ќе предложат и ГРОМ на Стевчо Јакимовски и „ЗНАМ“ на Максим Димитриевски.

Земјава официјално е во предизборен период. Спикерот Митрески ги распиша изборите. Првиот круг претседателски е закажан за 24-ти април, заедно со вториот на 8-ми мај, ќе се одржат и парламентарните.

Викторија Милевска