Во маркетите од петок нема повеќе да важат гарантираните цени

Поскапува храната. Лебот, млекото, сирењето, јајцата, тестенините, како и овошјето и зеленчукот од петок ќе се продаваат по пазарни цени. На мерката „гарантирани цени“ и се ближи крајот. Граѓаните реагираат оти и сега едвај крпат крај со крај, а камо ли по новото поскапување.

Синдикатите велат дека лошите ефекти од оваа непопуларна мерка дури сега ќе ги почувствуваат сите, поготово граѓаните со ниски примања.

Секое нелогично зголемување на цените ќе биде санкционирано, порачаа од Владата.

Пазарните и трудовите инспектори од петок ќе излезат на терен во контрола на цените на храната, но колку на пазарот ќе се стави ред не може никој да каже.

Синдикатите по којзнае кој пат алармираа дека мора да има реално зголемување на платите за граѓаните да живеат нормално.

Во меѓувреме, статистика пресмета дека на едно семејство за да го истурка месецот му се потребни околу 1.000 евра.

Според Организацијата за храна на Обединетите нации, цените на храната значително паѓаат и се најниски во последните три години. Кај нас, сепак трошоците за живот од месец на месец само растат.

Борис Грујоски