Осмомартовски концерт во организација на „Охридско лето“ со италијанскиот тенор Федерико Сера

Познатиот светски тенор Федерико Сера од Италија, во придружба на пијанистот Антонио Кампоногара, по повод 8. март ќе одржат концерт во организација на Националната установа „Охридско лето“.

Надвор од стандардната фестивалската програма „Охридско лето“ веќе трета година реализира концерти и во текот на целата година.

„Имавме прекрасен новогодишен концерт со оркестарот на Националната опера и балет а сега следи осмомартовскиот концерт на Денот на жената со оперскиот пејач од Италија Федерико Сера, чиј ментор е светскиот оперски пејач Андреа Бочели. Верувам дека тие оперски арии ќе нè однесат во светот на Џузепе Верди, во светот на Италија и тоа ќе биде подарок за охриѓанки а и за сите жени што сакаат да дојдат, што се поддржувачи и љубители на фестивалот „Охридско лето“, рече директорката на НУ „Охридско лето“, Наташа Поповиќ.

Од Националната установа „Охридско лето“ најавуваат дека по овој концерт следува Велигденски концерт, како завршница на концертите надвор од официјалната програма.

„Како најголема и најзначајна културна установа во државата сакаме врвната култура да живее преку цела година, со што од една страна го афирмираме Фестивалот а од друга страна и Охрид како град, но и државата во целина. Нудиме квалитет, а тоа го препознава нашата верна публика“, додаде Поповиќ.

Федерико Сера беше дел од четворицата светски познати тенори од Италија кои приредија незаборавен концерт на свеченото отворање на 62. издание на Фестивалот „Охридско лето“.

Концертот ќе се одржи на 8 март во црквата „Света Софија“ во Охрид, со почеток од 19 часот.