Гром усмрти тинејџер во гевгелиско Негорци

Трагедија се случи денеска во гевгелиското населено место Негорци, каде попладнево имаше силно невреме. Гром удри во тинејџер, кој починал на самото место.

Настанот го потврдија и од МВР. Од таму велат дека трагедијата се случила во атарот на селото Негорци, каде момчето напасувало добиток. Смртта ја потврдил лекар од Итната медицинска помош на Гевгелија кој констатирал изгореници по телото, најверојатно од гром.

Инцидентот во Одделението за внатрешни работи е пријавен во 15 часот и 30 минути по што на самото место излегла увидна екипа од полицијата, а по наредба на јавен обвинител телото било дадено на обдукција за да се утврдат и официјално причините за смртта.

Неофицијално станува збор за 17 годишно момче кое ја изнело стоката во атарот на селото Негорци, по што се случило и невремето проследено со громови, кои биле кобни за тинејџерот.