Започна реновирањето на „Куќата на џезот“
Просторот на НУ Национален џез-оркестар се наоѓа во подрумскиот дел на Националната опера и балет и почна да се адаптира по потпишаниот Договор меѓу вицепремиерот Битиќи, министерката за култура Костадиновска-Стојчевска и претставниците на ТАВ и „ТАВ констракшнс“...
Министерката за култура Бисера Костадиновска-Стојчевска, заменикот на претседателот на Владата задолжен за економски прашања и за координација со економските ресори и инвестиции, Фатмир Битиќи, директорот на „ТАВ констракшнс“, Фатин Кан, и претставници на Националниот џез-оркестар извршија увид во почетокот на реновирањето на просторот доделен на НУ Национален џез-оркестар.
Министерката за култура рече дека Џез-оркестарот секојдневно ја потврдува важноста на своето постоење, ги оправдува очекувањата и го потврдува реномето на репрезентативен музички ансамбл кој ја афирмира македонската култура во државава и надвор од неа.
Министерката за култура информираше дека на околу 500 квадратни метри ќе имаме најсовремени услови за работа на Оркестарот, со просторија за проби, магацини за инструменти, канцеларии за администрација, студио за снимање и режија и сето она што е неопходно за квалитетно творештво. Со проектот, како што додаде Костадиновска-Стојчевска, комплетно се реновираат подните и ѕидните површини и плафоните, а се поставува и нов систем за ладење и греење.
Вицепремиерот Битиќи, честитајќи го почекот на работите, подвлече дека досега со ТАВ и „ТАВ констракшн“, Владата има одлична реализација на сите проекти од ТАВ-програмата, што дава доверба дека и овој проект, како и другите, ќе биде завршен квалитетно и навремено.
Просторот на НУ Национален џез-оркестар се наоѓа во подрумскиот дел на Националната опера и балет и почна да се адаптира по потпишаниот Договор меѓу вицепремиерот Битиќи, министерката за култура Костадиновска-Стојчевска и претставниците на ТАВ и „ТАВ констракшнс“, пред два месеца.