Во Русија почна тридневното гласање за претседателските избори

Почна тридневното гласање за претседателските избори во Русија во 11 временски зони на 94.000 гласачки места. Изборите ќе ги набљудуваат делегации од 36 земји и пет меѓународни организации, а акредитирани сè повеќе од 200 парламентарни набљудувачи. Граѓаните избираат меѓу четворицата кандидати: Николај Харитонов од Комунистичката партија, Леонид Случки од Либерално-демократската партија, Владислав Даванков од партијата Нови луѓе и Владимир Путин како самостоен кандидат за петти мандат.

„Благодарност на Владимир Путин, тој прави се на Камчатка, им помага на луѓето, им помага на пензионерите, на сите. Тој е многу добар лидер“, изјави жителка на Камчатка.

„Ова е неопходно. Сега, во овој момент, земјата е во таква ситуација што ние дефинитивно треба да гласаме“, изјави жителка на Камчатка.

„Сега избираме претседател за државата. Помладата генерација мора да живее во мир и хармонија за да нема војна“, изјави жителка на Владивосток.

Во исто време, воената операција на Русија во Украина влегува во третата година и се гласа и во регионите анкетирани од Русија блиску до линијата на фронтот, Луганск, Доњецк, Запорожје, Керсон. Акциите на Москва наидоа на осуда од Киев.

„Невозможно е ова да се наречат избори кога во нашите мариуполски семејства со украинско потекло доаѓаат двајца со пушки и жена со кутија каде што треба да гласаме. Дали тоа може да се нарече избори?“, изјави Вадим Бојченко, украински градоначалник на Мариупол.

Анкетите објавени од руските државни медиуми покажуваат дека Путин ужива поддршка од околу 80 насто од граѓаните, што е повеќе отколку пред почетокот на војната во Украина. Според аналитичари, актуелниот претседател има целосна контрола врз политичкиот систем, а тројцата кандидати на гласачкото ливче се политичари од низок профил кои се на линијата на Кремљ.

„Изборите се продолжување на она што Русија го нарекува специјална воена операција. Мислам дека на изборите во окупирана Украина треба да гледаме како на оружје за војна, а не како на вежба на демократската франшиза“, изјави Сем Грин, директор во Центарот за анализа на европската политика во Вашингтон.

Од 25 февруари до 14 март се гласаше на оддалечени и тешко достапни места, вклучително и на поларните станици и на бродовите. Централната изборна комисија ќе излезе со првите резултати на 17 март во 21 часот, а прелиминарните резултати ќе ги соопшти на 18 март.

Маријана Димовска