Работниците од азиските земји стартуваат од април

За плата од 350 до 550 евра месечно, зависно од позицијата во хотелско угостителскиот сектор ќе работат увезените работници од Непал, Филипини, Индија и Малта. На тоа дополнително добиваат, осигурување, сместување и еден оброк. За истата плата не сакаат да работат домашните работници, велат хотелиерите. Нашиот кадар одлучно и масовно заминува во Хрватска, особено помладите генерации. Таму им се нудат плати од 1.000 до 2.000 евра.

„За жал, навистина ми е криво што ќе носиме луѓе од други земји од Непал, Филипини и Малта. Нашиот кадар не напушти, заминаа по Хрватска, по други дестинации иако после една година се враќаат откако ќе видат каква е ситуацијата таму. Но трендот на заминување расте па ние сме принудени да бараме варијанта, а тоа ни е увоз на кадар од други држави“, вели Муса Рашид хотелиер.

Кадарот од странство нема да биде во прва линија, повеќето ќе бидат ангажирани во кујна, помошници, хигиеничари, готвачи и собарки.

„Оваа година веќе ќе добиеме некои работници од други држави и ќе се пополнат некои дупки во работните места каде што ќе може да се употреби. Тие што не се напред, некој мора да работи и во позадина, да чистат, да средуваат, помошници во кујна, собарки итн. Имаме такви работници кои што ни фалат, и мислам дека ќе се направи едно рамнотежа оваа година и ќе биде полесна од минатата“, вели Крсте Блажески претседател на ХОТАМ.

Оваа туристичка сезона на брегот на Охридското Езеро се очекува да работат околу 600-700 вработени увезени од странство. Според ХОТАМ со нив ќе се пополни недостигот на кадар со кој се соочи секторот последниве години.

Соња Рилковска