Поднесени кандидатурите за претседател на државата, на потег се ДИК

Регистрираните гласачи во дијаспората ќе можат да гласаат само на претседателските избори, за парламентарните не е исполнет условот од минимум 5.350 пријавени за гласање. 7-те кандидати за претседателските избори: Стево Пендаровски, Гордана Силјановска-Давкова, Бујар Османи, Билјана Ванковска, Арбен Таравари, Стевчо Јакимовски и Максим Димитриевски, ги поднесоа документите и листите со потписи до Државната изборна комисија во предвидениот рок. МВР има 24 часа да провери дали ги исполнуваат условите: да се македонски државјани, дека имаат наполнети 40 години и дека престојувале во државата 10 од последните 15 години. Во ДИК комисија ги проверува листите со собраните 10 илјади граѓански потписи. Од СДСМ тврдат дека од ВМРО-ДПМНЕ за својот претседателски кандидат не собрале 10 илјади потписи.

Од ВМРО-ДПМНЕ возвратија дека Пендаровски озборува и пласира невистини, а поднесувањето на кандидатурата е технички процес.

„Поднесувањето на кандидатурата е технички процес, професорката Силјановска-Давкова имаше историски најголем одзив од граѓаните при собирањето на потписите за нејзината кандидатура и тоа е најголемата болка за Пендаровски и СДС. Поддршката од граѓаните е јасна и недвосмислена, а СДС и Пендаровски во истата ќе се уверат на 24-ти април и 8-ми мај“, велат од ВМРО-ДПМНЕ.

По завршувањето на проверката, ДИК на седница треба да ги потврди кандидатските листи. Најдоцна до 28-ми март треба да се изврши ждрепка за редоследот на гласачкото ливче. Изборната кампања за претседателските почнува на 4-ти април.

Колку граѓани со истечен рок на документи ќе може да гласаат на претстојните двојни избори ќе се знае по затворањето на избирачкиот список на 2-ри април.

Ирина Гелевска