Нови напади врз Украина
Киев осамна под експлозии, руската војска бомбардираше станбени области. Во Харков исто така има загинати. Украина возвраќа со дронови и со ракети од типот „Вампир“, но неуспешно. Американскиот национален советник за безбедност Саливан во тајна посета на украинската престолнина, не знае кога САД ќе ја испорачаат помошта од 60 милијарди долари. Москва се закани-доколку Европа се обиде со замрзнатите руски средства да ја финансира украинската одбрана, Кремљ ќе возврати со сите механизми …
„Се разбудив од првата експлозија, и тогаш се случи и втората. Ако не побегнеше син ми, ќе загинеше. Домот го нема веќе, проклети да се војната и Путин“, изјави Раиса, жителка на Киев.
„По втората експлозија, ја покрив ќерката со рацете. Парче од шрапнел го погоди прозорецот. Децата побегнаа во засолништето, јас се чудев што да правам“, изјави Виктор, жител на Киев.
Украина повремено одговара на постојаната офанзива со дронови-убијци кои се лесна мета за руската противвоздушна одбрана. На Киев очајно му недостига артилериска муниција, но Белата куќа точно не може да каже кога ќе пристигнат 60-те милијарди долари американска помош. Во тајна посета на Украина и националниот советник за безбедност на Бајден.
„Не можам да предвидам, работиме на помошта да ја добијат што е можно побрзо. Во Конгресот, републиканците ја блокираат“, изјави Џејк Саливан, национален советник за безбедност на САД.
„Американците ја поддржуваат нашата борба. И секретарот за одбрана Остин рече дека САД и сојузниците нема никогаш да дозволат Русија да ја порази Украина и да постигне каков и да е успех“, изјави Андриј Јермак-шеф на кабинетот на претседателот на Украина.
На Украина и снемува муниција, предупреди и генералниот секретар на НАТО по средбата со словенечкиот премиер во Брисел. Столтенберг пред истекот на мандатот се обидува да ги анимира европските земји за зголемување на помошта.
„И покрај големите загуби, Путин не се откажува од воените цели. Состојбата на бојното поле е многу тешка. Украина останува без муниција. И треба веднаш поголема помош“, изјави Јенс Столтенберг-генерален секретар на НАТО.
„Но и за Западниот Балкан, Словенија е апсолутно и витално заинтересирана за да ја заштити безбедноста во регионот. Не само поради соседството, бидејќи сме мекиот стомак на Европа, така да речеме. Во последните години, нестабилноста се зголемува. Изразивме подготвеност да го зголемиме контингентот во КФОР“, изјави Роберт Голоб-премиер на Словенија.
На фронтот во Украина, во Харков загинаа петмина. Киев со ракети „вампир“ се обиде да го погоди Белгород. Неуспешно. Москва и се закани на Европа, ќе ги искористи сите правни механизми доколку со замрзнатите руски средства се финансира помошта за Украина.
Зоран Богатинов