Петровска се сретна со шведската амбасадорка Ларсон Јаин

Министерката за одбрана Славјанка Петровска денеска се сретна со амбасадорката на Кралството Шведска во Северна Македонија, Ами Ларсон Јаин на која и го честиташе полноправното членство во НАТО, за кое рече ја зацврстува Алијансата и безбедноста на над една милијарда луѓе во светот.

„Северна Македонија беше јасна во својот став за поддршка на шведското барање за приклучување кон најмоќната Алијанса во светот. Тоа го потврдивме и на 27 јули минатата година кога Собранието ги ратификуваше протоколите за влез на Финска и Шведска во НАТО“, рече министерката.

Нашата цел е иста – заштита на секоја педа НАТО територија и заштита на нашите граѓани, рече министерката, и додаде дека она што нè врзува се вредностите на демократијата, слободата и почитувањето на меѓународниот правен поредок.

Амбасадорката Ларсон Јаин се заблагодари за јасната поддршка од Северна Македонија во периодот на приклучување на Шведска во НАТО и додаде дека земјата е посветена на јакнењето на колективната безбедност на Алијансата.

Шведска официјално се приклучи на НАТО како 32-земја членка на 7 март 2024 година.