Охридското Езеро секојдневно е под притисок на отпадните води

Загадувањето е еден од главните предизвици со кои се соочува најстарото езеро во Европа. Охридското Езеро секојдневно е под притисок на отпадните води од колекторски систем, но и реките и отпадот кој го одлага населението, како и големиот број пловила.

Најзначајниот воден екосистем на континентот дополнително се искористува и како акумулација за производство на електрична енергија, а осцилациите на нивото на езерото имаат негативни последици врз биодиверзитетот. Научниците од Хидробиолошкиот институт велат потребна е одржлива стратегија за поголема заштита.

„Кога станува збор конкретно за Охридското езеро многу се предизвиците што за жал е соочено. Тука накусо би ги наброила загадувањето од икс причини загадување од отпадни води, индустрија, комуналии, домаќинствата. Не можеме сами да се справуваме со предизвиците доколку и македонската и албанската страна не си ги преземат одговорностите и не се насочат кон решавање на сите проблеми кои ги имаме во регионот“, вели Орхидеја Тасевска, директор на Хидробиолошкиот институт-Охрид.

Имаме неразумно и несовесно искористување на водените ресурси. Потребна е повисока свест кај населението за заштита, но и штедење на водата.

„Се ова ѓубре што гледате тоа е домашна култура. Немањето основна култура е она што се случува, големо ѓубре фрлање, а најмногу загадуваат реките. Голем дел од отпадните води одат во Охридското Езеро“, вели еден охриѓанец.

„Воопшто не го штитиме, за жал‘, вели друг.

„Не водиме доволно. Колекторот работи, но негде кога ќе врне дожд се излева канализацијата“, рече друг.

Министерството за животна средина во февруари годинава го усвои Предлог-законот за прогласување на Охридско Езеро за споменик на природата, според нив со овој закон ќе придонесе за поголема заштита и зачувување на природните вредности. Оваа година Светскиот ден на водите се одбележува под мотото Вода за мир.

Соња Рилковска