Османи: Во следните четири години заокружување на интегративниот процес
Интеграција во Европската унија и економски рамковен договор – ова се дел од заложбите на кандидатот за претседател од Европскиот фронт, Бујар Османи…
Како главен преговарач со ЕУ, кој, како што вели ги водел најтешките интегративни процеси и кому му се познати сите детали, претседателскиот кандидат Бујар Османи од „Европскиот фронт“ смета дека во следните четири години ќе го заокружи интегративниот процес.
Главната улога на претседателот е да креира државен консензус, смета Османи, па доколку ја добие довербата од гласачите веднаш ќе побара од клучните политички чинители да седнат на маса и да се договорат за државните приоритети.
„Не сум сигурен во победа, туку во искреноста на визијата која ја нудам за европска држава, а одлуката е на граѓаните. Најпонизно ја барам нивната поддршка“, вели Османи.
Како лекар, луѓето никогаш не го прашувале за етничката припадност, вели Османи, па затоа и сега очекува да не се ограничуваат на етничките и политичките рамки, туку да ги имаат предвид искуството и знаењето.
Александра Велинова