СТО: Опоравување на светската трговија и покрај ризиците од конфликтите

Опоравување на глобалната трговија годинава предвидува Светската трговска организација (СТО). Сепак, конфликтите, геополитичките тензии и неизвесноста на економската политика претставуваат значителни негативни ризици.

„Се движиме кон закрепнување на глобалната трговија, благодарение на отпорните синџири на снабдување и силната мултилатерална трговска рамка“, коментираше генералниот директор на СТО, Нгози Оконџо-Ивеала.

Таа додаде дека е императив да се ограничат ризиците, како што се геополитичките немири и ситнење на трговијата со цел да се одржи економскиот раст и стабилност.

Во извештајот се проценува дека растот на глобалниот БДП ќе остане стабилен во целина во следните две години, а се очекува да достигне 2,6 отсто во 2024 година и 2,7 отсто во 2025 година.