Не мируваат размените на оган во Појасот Газа

Израелската војска вети дека ќе го гони Хамас насекаде во Газа, по објавувањето на видеоснимка од израелско-американски заложник. 23-годишниот Херш Голдберг-Полин беше киднапиран на музички фестивал кога Хамас го нападна Израел на 7-ми октомври.

„Денеска сме тука со молба до сите лидери на страните кои преговараа, искористете го овој момент и постигнете договор“, изјави Џон Полин, татко на заложник на Хамас.

„Го чувме твојот глас првпат по 201 ден и ако можеш да не слушнеш, ти кажувам, те сакаме, остани силен, преживеј!“-изјави Рејчел Голдберг-Полин, мајка на заложник на Хамас.

Хуманитарна помош за Палестинците во Појасот Газа

„Оваа снимка е психолошки терор. Тоа е потсетување колку е болна оваа терористичка група, која ги тероризира и заложниците и нивните семејства“, изјави Даниел Хагари, портпарол на израелската одбрана.

Во момент кога нападите се интензивираат, американскиот претседател повика новата хуманитарна помош веднаш да стигне до Палестинците во Појасот Газа. Во услови на застој во неколкумесечните разговори за прекин на огнот, од Хамас велат дека се подготвени на примирје со Израел доколку се формира независна палестинска држава.

„Подготвени сме да ги продолжиме преговорите за да се постигне прекин на огнот и целосно повлекување на силите. Израелците сакаат да окупираат дваесет проценти од Појасот Газа во она што тие го нарекуваат безбедна зона – ова е неразумно“, изјави Халил ал-Хаја, висок функционер на Хамас.

Половина од командантите на либански Хезболах на југот на земјата се елиминирани, тврди израелскиот министер за одбрана. Јеменските Хути пак, ја презедоа одговорноста за нападите врз американски брод во Аденскиот залив, како и врз израелски брод во Индиски Океан.

Маријана Димовска