ДИК: Гласањето за затворениците, болните лица и дијаспората помина без проблеми

Вчера гласаа затворениците и лицата во притвор, болните и немоќните, лицата во старечките домови, внатрешно раселените и македонската дијаспора. Од Државната изборна комисија информираа дека гласањето поминало без проблеми.

Според информациите од општинските изборни комисии, гласале 8 илјади 926 болни или немоќни лица за претседател на државата, односно 80,45 насто, а 10 илјади и 36 или 92,4 за пратеници. Избирачкиот процес вчера се одвиваше и во казнено-поправните установи за 2 илјади 147 затвореници и лица во притвор.

Правото на глас го искористиле 60,46 проценти за претседателските, односно 68,72 за парламентарните. Излезноста во 20 центри за вонсемејна грижа е 75,9 насто од пријавените 534 лица. За гласање во дијаспората беа пријавени две илјади 569 избирачи во 31 место во дипломатско-конзуларните претставништва. Вкупната излезност е 25,38 проценти, но тука не се вклучени неколку избирачки места поради временската разлика.