Руските сили тврдат дека освоиле уште еден град во областа Харков

Руските трупи тврдат дека зазеле уште еден град во областа Харков во Украина. Во тек е евакуација на населението. Од ООН апелираат руските сили да ја прекинат офанзивата, предупредувајќи дека новите борби во пограничните области носат жртви и раселување.

„Ова е област на интензивни борби, така што безбедносната ситуација е многу тешка. Во оваа фаза е тешко да се утврди што се случува на теренот. Повикуваме руските вооружените сили да ја прекинат офанзивата и да се повлечат до меѓународно признатите граници“, изјави Лиз Тросел – портпарол на високиот Комесаријат за човекови права на ООН.

Американската воена помош веќе е на пат кон Украина, и таа ќе направи вистинска разлика на фронтот, порача американскиот државен секретар Блинкен при ненајавената посета на Киев. Зеленски одново побара системи за противвоздушна одбрана.

„Знаеме дека ова е предизвикувачко време, но и дека во блиска иднина ќе пристигне уште повеќе помош, таа е на пат, дел од неа пристигна, ќе пристигне уште повеќе и ќе направи вистинска разлика против тековната руска агресија на бојното поле. Решени сме заедно со многу други партнери на Украина, да се погрижиме да успеете во тоа“, изјави Ентони Блинкен – државен секретар на САД.

Во пакетот воена помош, кој минатиот месец беше одобрен од Конгресот, се наоѓаат ракети за противвоздушни системи, муниција за ракетните системи со среден и голем дострел, како и основната муниција.

Зеленски одново побара системи за противвоздушна одбрана.

„Ова е тежок период за истокот на нашата земја, ви благодариме што дојдовте особено овие денови за поддршка на Украина, за овој сигнал, за клучниот пакет за нашите сили, благодарност до конгресот и до претседателот Бајден“, изјави Володимир Зеленски - претседател на Украина.

Офанзивата во Харков, воените аналитичари ја оценуваат како еден од најзначајните руски копнени напади од почетокот на војната.

Маријана Димовска