Зголемен бројот на закани врз високи функционери во Европа пред изборите за нов Европски парламент
Зачестија заканите, притисоците и обидите да се загрози силната безбедност на високи функционери во европски и светски рамки. Атентатот врз словачкиот премиер Фицо го запали алармот. Дали овие случувања се поврзуваат со претстојните избори во Европскиот парламент по најавените преструктурирања за коалиции...
Атентатот на словачкиот премиер Фицо, заканите кон српскиот претседател Вучиќ, зачестените напади против локалните политичари во Германија, го запалија алармот пред европските избори. Фрлаат дамка врз безбедноста на државите, но и Европа. Изборите за новиот Европски парламент ќе бидат круцијални, и може да се очекува да влијаат врз безбедноста на стариот континент, смета Зоран Додевски.
Професорот Злате Димовски пак смета дека овие случувања имаат поврзаност, а тоа е незадоволството кај граѓаните од нивното долгогодишно владеење. Тој не ја исклучува можноста да се случат нови напади кон високи политички фигури, поради кочењето на општествените текови за политички цели.
Војната во Украина и случувањата меѓу Израел и Палестина имаат влијание и предизвикува емоции кај народот кои можат да бидат изразени и во радикални форми и напади – велат аналитичарите. Ваквите слики ќе бидат присутни, за ова придонесуваат и различните ставови на различни челници од европските држави. Органите кои го спроведуваат законот во Македонија треба да ја зајакнат својата работа и да не дозволат притисоци и заканите врз поединци и институции. Доколку се увидат вакви активности треба веднаш да се реагира-сметаат експертите.
Викторија Милевска