Заврши мандатот на претседателката Кацарска

Заврши мандатот на претседателката на највисокиот суд во државата, Уставниот, Добрила Кацарска. Работењето на Судот под нејзино раководство, го оцени како успешно и покрај фактот што половина од нејзиниот мандат имало само пет судии. Сепак, успешно и навреме одговориле на сите претставки доставени до судот, изјави Кацарска на завршната прес-конференција. Посочи дека се воведени новини, така што сите граѓани можат да поднесат претставка до Уставниот, а ако не можат во нивно име може да поднесе Народниот правобранител. За поефикасно работење во служба на граѓаните, нагласи дека е покрената иницијатива за воведување уставна тужба која би требало да биде усвоена во мандатот на идниот претседател.

Последната прес-конференција со медумите беше искористена и за мислење на првиот човек на Судот, дали е уставно техничкиот премиер да продолжи да ја извршува функцијата иако доби пратенички мандат, на што Кацарска посочи дека такви случаи имало и во минатото.

Кацарска се уште не е информирана за завршица на заканите упатени до неа која ги пријави во полиција и не може да претпостави дали заканите ќе престанат по завршетокот на нејзиниот мандат.

Новиот претседател на Уставниот суд треба да биде избран до 2-ри јуни со тајно гласање на судиите во Судот.

Ирина Гелевска