Огромни штети од пожарот во битолската фабрика „Виго 48“

Доцна синоќа е локализиран пожарот кој избувна во кондиторската фабрика „Виго 48“ во Битола, поранешен „Прогрес“, но се уште се појавуваат помали облачиња чад поради догорувањето на делови од покривот и опремата.

Противпожарни екипи будно ја следат состојбата за да не дојде до повторно разгорување на огнот. Опасност претставуваше близината на плинскиот магацин кој во моментов не е загрозен.

Во кругот на фабриката цела ноќ и изутринава останаа педесетина работници кои што ја делат судбината со вкупно 200 вработени во капацитетот.

Штетите се огромни ако се знае дека е изгорен речиси половина од објектот, опремата, суровините и готовите производи.

Истрагата ќе ги открие причините за пожарот кој избувна вчера околу 13 часот и 30 минути.